Benqueridos nenos, nenas e familias:
Esta semana rematamos un curso
atípico no que todos xogamos un papel inesperado que nunca imaxinamos ter que
desenvolver.
Dun día para outro, recollemos
todo o que tiñamos no cole ás presas, e as
casas convertéronse en aulas improvisadas nas que pais e nais tivestes que
guiar aos vosos fillos e fillas nunha nova realidade, na que o académico pasou
a un segundo plano, e o importante foi cubrir esas carencias que os pequenos
tiveron a outros niveis moito máis esenciais. Se algo nos ensinou todo isto foi
a relativizar e a poñer cada cousa no seu lugar. Carentes de risas, momentos e
xogos compartidos entre iguais, os nenos tiveron en vós unha axuda e apoio que
seguro non esquecerán.
E vós, os nosos alumnos e
alumnas, superastes con creces todas as expectativas, estando presentes, cumprindo
coa entrega do que vos pedimos e mantendo o ánimo e o interese ata o último
momento. Que ben o fixestes!
Por todo iso, grazas. Grazas por
facernos sentir afortunadas de seguir crendo nunha profesión, agora se cabe, aínda con máis forza.
Despedimos o curso e con el
moreas de correos electrónicos, incertidume e inquedanza, á espera de
reencontrarnos moi cedo e poder compartir
con vós todo o que durante este tempo non puidemos.
Agora toca desconectar e
recargar enerxías para en setembro atoparnos de novo.
Bo verán e vémonos á volta!
Unha aperta
enorme e novamente grazas.
As titoras
PD: Deixámosvos un pequeno agasallo feito con todo o noso cariño que desexamos que vos guste. Podedes imprimilo en cartolina ou en papel fotográfico. Están en dous formatos, se imprimides é mellor facelo en .png xa que ten unha mellor resolución.
